STEM- அநுபொகம்

அண்மைக்காலமாக அதிகம் பேசப்படும் ஒரு விடயம் STEM கல்வி. இதை அறிவியல், தொழில்நுட்பம், பொறியியல், கணிதம் என்னும் நான்கு பிரிவாக விளக்கமாகச் சொல்லப்படும். Science, Technology, Engineering and Mathematics என்னும் இந்த நான்கு கற்கைகளையும் அவற்றின் முதலெழுத்துக்களால் STEM என்று ஆங்கிலத்தில் அழைக்கப்படும். STEM என்பதை ஸ்டெம் என்றுதான் தமிழில் பலரும் இதுவரை எழுதி வருகின்றனர். STEM என்று ஆங்கிலத்தில் சொல்வதற்கு இலகுவாக இருப்பது போல தமிழிலும் இதற்கான ஒரு சொல்லை உருவாக்கும் முயற்சியில் பலவருடங்கள் நான் முயன்றும் அதில் திருப்தியான ஒரு சொல் கிடைக்காததால் முகப்புத்தகம் ஊடாக கடந்த சில நாட்களாக பெரியளவில் கலந்துரையாடல் நடைபெற்று பல சொற்கள் பலராலும் பரிந்துரைக்கப்பட்டுள்ளன. கணினி, இணையம் என்பவை போலல்லாமல் இது மிகவும் சவாலாகவே இருப்பதற்கு காரணம் இவை சொற்களின் சுருக்கமாக (abbreviation) இருப்பதுதான். ஏற்கனவே உருவாக்கப்பட்டு புழங்கி வரும் தமிழ்ச்சொற்களும் புதிய சொற்கள் உருவாக்கும்போது தடையாகவுள்ளன. உதாரணத்திற்கு Mechanical Engineering என்பதை இயந்திர பொறியியல் என்கின்றோம். ஆனால் பொறியியல் என்பதே பொறி என்னும் இயந்திரத்தின் இன்னொரு சொல்லில் இருந்தே வருகின்றது.

STEM இற்கான தமிழ்ச் சொல் சுய விளக்கமளிப்பதாக (self explanetory) இருப்பதுடன் சிறுவயது மாணவர்களுக்கு குழப்பமில்லாதவாறு ஆங்கிலத்தில் உள்ள அதே ஒழுங்கு மாறாததாகவும் இருப்பது சிறப்பாக இருக்கும்.

இவற்றை கருத்தில் கொண்டு அநுபொகம் (அறிவியல், நுட்பவியல், பொறியியல், கணிதம்) என்னும் சொல்லை நான் பரிந்துரைக்கலாம் என்று நினைக்கின்றேன். இச்சொல்லை ஆரம்பத்தில் அறிமுகப்படுத்தும்போது எழுத்துக்களை வேறு நிறத்தில் மாற்றி எழுதுவதால் எப்படி இச்சொல் உருவாக்கப்பட்டது என்றும் சிறுவர்களுக்கு புரியவைக்கலாம். அறிவியல் எமக்கு வேண்டாம் விஞ்ஞானம் தான் வேண்டும் என்பவர்கள் விநுபொகம் என்று பாவிக்கவும் முடியும். இறுதி எழுத்து “ம்” உச்சரிப்பதற்கு இலகுவாக இருப்பதற்காக சேர்க்கப்பட்டுள்ளது.

வசனங்களில் எழுதும்போது “அநுபொக கல்வி” அல்லது “விநுபொக கல்வி” என்றும் எழுதமுடியும்.

இச்சொல் உங்கள் பலரதும் பங்களிப்பின் விளைவாக உருவாக்கப்பட்டுள்ளது என்பதை மகிழ்ச்சியுடம் தெரிவிக்கின்றேன்.

Leave a Reply

Your email address will not be published. Required fields are marked *